قوْیدون منی بوائوده مله‌ر، آغلارام نه‌نه

گئتدین مزاره دیلده شرر، آغلارام نه‌نه

نیسگیلله‌رین دوشه‌ر یادوما قلبیم اوْدلانار

اللر اوره‌کده شام و سحر آغلارام نه‌نه

یاد ائیله‌ره‌م سنیله کئچه‌ن گونله‌ری مودام

هاردان اوْ گونله‌ریم قایودار آغلارم نه‌نه

 سسله‌ردیم هر زاماندا نه‌نه، سس گله‌ردی جان

خوْش گونلریم کی یاده دوشه‌ر آغلارام نه‌نه

دردین دییه‌ر آناسونا قوز دوشسه موشگوله

نئیله‌ر آناسو اوْلماسا گر آغلارام نه‌نه

قارداش آتا باجو هاموسو، کیمسه‌دیر ولی

واردور آنادا آیرو ثمر آغلارام نه‌نه

ائوده آتا، آنا یئری وئرمه‌ز، یقیندی بو

هر گولده وار بیر عطر-ی-دئگه‌ر، آغلارام نه‌نه

گ?ن دؤنسه آی دوْلانسا گله‌ر بایرام آخشامو

بایراملوق الده گؤرسه‌م اگر، آغلارام نه‌نه

قارداش دا گئتمه‌‌سه باجو دیدارینه اگر

دیلده‌ن مگر آناسودؤزه‌ر، آغلارام نه‌نه

هر کس گؤروب آنا داغونو یاخشو درک ائده‌ر

قلبیم نده‌ن غموندا اسه‌ر آغلارام نه‌نه

قلبیم دوْلان زاماندا هئی سسله‌ره‌م سنی

گلمه‌ز منه جاواب ی دیگه‌ر، آغلارام نه‌نه

آمما بو آغلاماق غم-ی-دیگر سالور یادا

دیل یاندورار اوْ غملی خبر، آغلارام نه‌نه

آغلار اوْ غمده زینب-وْ-کلثوم، حوسئن حسن

آغلار اوْ غمده چوْخ نه‌نه‌لر، آغلارام نه‌نه

زینب دییه‌ردی ائی آتامون یاوری آنا

ائتدین نده‌ن بو نوعی سفر، آغلارام نه‌نه

هانسو آنا سنین کیمی گؤز یاشلوباغروقان

گؤزده‌ن آتار بالانو مگر، آغلارام نه‌نه

زینب هارا آنا بو قده‌ر درد-وْ-غم هارا؟

هانسو اوره‌ک بو درده دؤزه‌ر، آغلارام نه‌نه

آخشام اوْلان زامان چوراغو ائولرین یانار

قلبیم دوباره غصّه‌له‌نه‌ر، آغلارام نه‌نه

تقدیم به روح پاک مادر مهربانم که به تاریخ 26/11/91دعوت حق را لبیک گفته ودرسن79سالگی به دیارباقی رفتند